"İpəkçi" qəzetinin birinci nömrəsi “Nuxa ipək kombinatı firqə kollektivinin və yerli komitəsinin orqanı” və çoxtirajlı qəzet olaraq 13 mart 1933-cü il tarixdə çıxıb. Qəzetin ilk redaktoru R.Rəsullu olub. Daha sonra "İpəkçi" Ə.Hacıyevin (1935–8 yanvar 1939-cu il tarixləri arasında), Ə.Yusifovun (2 fevral–10 mart, 1939-cu il tarixləri arasında), G.Əlimovun (mart 1939–13 may 1940), Ə.Yusifovun (21 may, 1940-cu il tarixdən), M.Kərimovun (28 may–18 sentyabr, 1940-cı il tarixləri arasında), P.İsmayılovun (24 sentyabr 1940-cı il tarixdən) redaktorluğu ilə çap olunub. Böyük Vətən müharibəsinin (1941–1945) başlaması ilə əlaqədar olaraq qəzetin nəşri dayandırılsa da, müharibədən 13 il sonra – 1958-ci ildə, yenidən bərpa edilib. 1958 – 1965-ci illərdə redaktor M.Cabbarov (Məmmədiyyə Süleymanlı), 1965 – 2009-cu illərdə S.Məmmədov (M.Salis), 2009-cu ildən isə A.Məmmədov olub. 2012-ci ildə “İpəkçi” qəzetinin redaktor ştatı ləğv edilsə də A.Məmmədov qəzetin nəşrini 2018-ci ilədək, qəzetin saytının fəaliyyətini isə 2022-ci ilin sonunadək davam etdirib. Qəzetin nəşri və saytın fəaliyyəti bir müddət dayandıqdan sonra 3 mart 2025-ci il tarixdə A.Məmmədov hər ikisinin fəaliyyətini yenidən bərpa edib (3 mart 2025-ci il tarixdə A.Məmmədovun “Şəki Ensiklopediyası” Məhdud Məsuliyyətli Cəmiyyətinin “İpəkçi” qəzeti çap mediası redaksiyası Azərbaycan Respublikası Medianın İnkişafı Agentliyinin Media Reyestrinə daxil edilmişdir). 2007-ci ildən qəzetin internet saytı da fəaliyyət göstərir (2018–2022-ci illərdə saytın rusca versiyası da olmuşdu).