Biz yenə də sizinləyik!

Hörmətli oxucular!

“İpəkçi”nin bundan əvvəlki nömrəsi 11 sentyabr 2018-ci il tarixdə çap olunmuşdu. Ondan sonra biz qəzetin yalnız saytının fəaliyyətini davam etdirdik. Amma 2022-ci ilin sonunda saytın fəaliyyətini də dayandırmağa məcbur olduq.

2025-ci ilin əvvəllərində düşündük ki, nəyin bahasına olursa-olsun qəzeti və qəzetin saytını bərpa etmək lazımdır. Ən əvvəla ona görə ki, Azərbaycanda ipəkçilik tamamilə iflasa uğramaq üzrədir. Nə qədər ki, “İpəkçi” fəaliyyətdə idi, biz bunun qarşısını almağa çalışırdıq, bizi eşidirdilər, yazdıqlarımızı oxuyurdular və nəticə çıxarırdılar. Biz meydandan çəkildikdən sonra ipəkçiliyin tənəzzülü də sürətləndi, Şəki ipək kombinatı da fəaliyyətini demək olar ki tam dayandırdı. İkincisi isə bu il Azərbaycan milli mətbuatının 150 illik yubileyidir. Biz istəyirik ki, milli mətbuatımızın 150 illiyində “İpəkçi” qəzeti də meydanda olsun!

3 mart 2025-ci il tarixdə biz “İpəkçi” qəzeti çap mediası redaksiyasını özümüzün “Şəki Ensiklopediyası” Məhdud Məsuliyyətli Cəmiyyətimizin tərkibində Azərbaycan Respublikası Medianın İnkişafı Agentliyinin Media Reyestrinə daxil etdirdik. Sonra yeni saytımızı yaratdıq. Tezliklə qəzet üçün ISSN kodu almağı da planlaşdırmışıq. Amma biz qəzeti hələlik yalnız A3 formatda 2 səhifə çap etdirəcəyik. Ən əvvəla ona görə ki, qəzeti 4-8 səhifə çap etdirmək üçün maddi imkanımız yoxdur. İkincisi isə “İpəkçi” sovet dövründə yalnız elə bu formatda çap olunmuşdu.

Beləliklə, 7 ilə yaxın müddət keçdikdən sonra “İpəkçi” qəzeti yenidən işıq üzü görür. Qəzetimizin həcmi kiçik, tirajı az olsa da, hədəfi böyükdür... 

A.Məmmədov, baş redaktor.