Şəki şəhər sakini Nəbi Hüseynbəyli Azərbaycan Respublikasının İqtisadiyyat Nazirliyi yanında Əmlak Məsələləri Dövlət Xidmətindən (ƏMDX), həmin qurumun Şəki Ərazi şöbəsindən və Daşınmaz Əmlakın Kadastrı və Reyestri Publik Hüquqi Şəxsin (DƏKR PHŞ) Yer Quruluşu Mərkəzindən şikayətçidir. Bildirir ki, həmin qurumlar onun müraciətinə əsasən Şəki bələdiyyəsi tərəfindən onlara təqdim olunmuş sənədlərin icrasından qərəzli şəkildə və qanunsuz olaraq imtina edirlər. Elə bu səbəbdən də dövlət başçısına və bir sıra yuxarı instansiyalara yazılı şəkildə müraciət etməyə məcbur olub. Onun müraciətini biz də aşağıda oxucularımıza təqdim edirik:
Möhtərəm Prezident İlham Əliyev Cənabları!
Hörmətli Baş Prokuror cənab Kamran Əliyev!
Konstitutsiya Məhkəməsinin sədri hörmətli cənab Fərhad Abdullayev!
Milli Məclisin sədri hörmətli xanım Sahibə Qaffarova!
Biz vətəndaşlar yerli bələdiyyə orqanlarına seçkilərdə iştirak edərək yerli idarəetmə orqanına nümayəndələr seçmişik. Lakin, bu gün Dövlət Şəhərsalma və Arxitektura Komitəsi, İqtisadiyyat nazirliyi, onun ƏMDX, DƏDKR PHŞ, Yer Quruluşu Mərkəzi və Hərracın Təşkili Mərkəzi bələdiyyələrə rəhbərlik, faktiki onları idarə etməyə çalışır. Bir sözlə bələdiyyələri Dövlət Arxitektura və Şəhərsalma Komitəsi, İqtisadiyyat nazirliyi və onun qurumlarının bir şöbəsinə çevrilməyə cəhd edirlərr. İqtisadiyyat nazirliyi gündə bir qərar qəbul edərək bələdiyyələrin səlahiyyətlərini hər dəfə özbaşına olaraq əlindən alır.
Siz təsəvvür edin ki, Şəki şəhər Bələdiyyəsi qalıb bir tərəfdə, ƏMDX, ƏMDX-nin Şəki Ərazi Şöbəsi, DƏDKR PHŞ-nin Yer Quruluşu Mərkəzi bələdiyyə mülkiyyəti üzərində hökm verir, istədikləri qiyməti təyin edir, özbaşına olaraq torpaq islahatının bitməsinə baxmayaraq qanunsuz torpaq islahatı keçirir, ƏMDX-nin Şəki Ərazi şöbəsi faktiki olaraq Şəki şəhərinin baş memarı funksiyasını özbaşına əlinə keçirərək istədikləri torpaq sahəsinin təyinatını dəyişdirir və s. özbaşınalıqlara yol verirlər. Dəfələrlə müraciət edirik, lakin yüz cürə bəhanə ilə sənədləşmədən imtina edirlər, özbaşına işlərin dayandırıldığını deyirlər, ancaq lazım gələndə kiminsə tapşırığı və ya marağı ilə bütün işlər görülür. Mənim neçə-neçə müraciətim ƏMDX-nin Şəki Ərazi şöbəsində baxılmamış qalır. İddiasını edəndə də guya dövlətin idarəsinin işinə müdaxilə kimi qiymətləndirirlər.
Bələdiyyələr haqqında qanun qalıb bir tərəfdə və ümumiyyətlə silinib, Milli Məclis isə buna göz yumur. Adını da qoyurlar ki, bələdiyyələr qanunsuzluqlara yol verirlər. Dövlət Şəhərsalma və Arxitektura Komitəsi, İqtisadiyyat nazirliyi,onun ƏMDX, DƏDKR PHŞ-nin Yer Quruluşu Mərkəzi, Hərrac Komissiyası nə vaxtdan bələdiyyələrin fəaliyətinə nəzarət edən orqan olub? Əgər qanunsuzluqlar varsa prokurorluq orqanları bunu araşdırmaq hüququna sahibdir. Deməli belə çıxır ki, Dövlət Şəhərsalma və Arxitektura Komitəsi, İqtisadiyyat nazirliyi,onun ƏMDX, DƏDKR PHŞ-nin Yer Quruluşu Mərkəzi və Hərracın Təşkili Mərkəzi artıq prokurorluq orqanlarının da fəaliyyətini məhdudlaşdıraraq özbaşına onların funksiyalarını yerinə yetirirlər.
Ədliyyə nazirliyinin Bələdiyyələrlə İş Mərkəzi isə bu biyabırçılıqları kənardan seyr edir. Bu da bir kənara dursun, Milli Məclis də buna biganə qalır. Məgər Bələdiyyələr haqqında qanunu Milli Məclis qəbul etməyib? Bəs onda Milli Məclis Dövlət Şəhərsalma və Arxitektura Komitəsi, İqtisadiyyat nazirliyi,onun ƏMDX, DƏDKR PHŞ-nin Yer Quruluşu Mərkəzi və Hərracın Təşkili Mərkəzi bələdiyyələr haqqında qanunda hər gün özbaşına edilən qanunsuz dəyişikliklərə niyə göz yumur?
Siz təsəvvür edin ki, ƏMDX Yer Quruluşu Mərkəzi ilə əlbir olaraq istədiyi torpaq sahəsinin bələdiyyə tərəfindən vətəndaşa satıldığı və icarəyə verdiyi halda özbaşına kateqoriyasını dəyişərək istədikləri adama dövlət torpağı kimi satırlar. Bu biyabırçılıq və qanunsuz hegomonluqdur. Məhkəməsiz və heç bir icazəsiz bələdiyyənin qərarı bir tərəfə atılaraq bir qrup şəxs tərəfindən həmin torpaq sahəsi istədikləri şəxsə satılır. ƏMDX DƏDKR PHŞ-nin Yer Quruluşu Mərkəzi isə ƏMDX-nin göstərişi ilə istədikləri koordinatı qanunsuz dəyişərək saxtakarlıqla məşğul olurlar. ƏMDX və Rüstəm Şahbazov kimiləri də bu işdə onlara havadarlıq edirlər. Bələdiyyə torpağının satın almaq üçün müraciətim Rüstəm Şahbazov tərəfindən gah qəbrstanlıq yeri, gah da örüş yeri kimi imtina olunur, kimin üçün isə saxlanılır, qəbrstanlıq yeri isə ƏMDX-nin Şəki Əİ tərəfindən sifarişli şəxsə satılır. Bəs Rüstəm Şahbazov hara baxır? Deməli özbaşınalıqlar Rüstəm Şahbazov və digərlərinin sifarişi əsasında baş verir. Qanunsuzluqlar barədə müraciət etdikdə isə üzə deyirlər ki, vətəndaş dövlət idarəsinin işinə qarışır. Məgər ictimai rəy, ictimai qınaq qanunsuzluqdur?
Dəfələrlə Baş nazir cənab Əli Əsədova da müraciət etmişəm. Şəhərin ortasında, prospektin kənarında satın almaq istədiyim torpağı örüş yeri kimi imtina edən Rüstəm Şahbazovun saxtakarlığını Nazirlər kabinetində araşdıran heç kim yoxdur? Mənə elə gəlir ki, əgər Sizə, Baş nazirə olan müraciətə Rüstəm Şahbazov riyakarlıqla, saxtakarlıqla qanunsuz imtina verirsə deməli o nə Dövlətin Başçısını, nə də hökumətin başçısını sayır. Siz buna necə biganə qalırsınız? Dövlətin Başçısına olan müraciətə riyakarlıqla yalan cavab verilirsə deməli bu məmur cinəyatkardır. Bəs bu cinayətkarlığa niyə göz yumulur? Yəni Azərbaycanda elə bir məmur yoxdur ki, Rüstəm Şahbazovun yalanını ifşa etsin? Yoxsa var, amma Rüstəm Şahbazovdan qorxur? ƏMDX-nin Şəki Ərazi Şöbəsinin rəisi kabinetindən çıxıb həmin yerə baxış keçirib niyə Rüstəm Şahbazova demir ki, həmin yer örüş yeri deyil. Şəhərin ortasında DƏDKR PHŞ-nin Yer Quruluşu Mərkəzi Şəkidəki şöbəsinin tərtib etdiyi düzəlişləri təqdim etməsinə baxmayaraq niyə yer barədə düzgün məlumatları ƏMDX-nin Şəki ƏŞ Rüstəm Şahbazovun gözünə soxmur ki, şəhərin ortasında 20 metr uzunluğunda, 10 metr enində örüş yeri Qoçu Əsgərin keçisi üçün saxlanılıb? ƏMDX-nin Şəki Ərazi Şöbəsinin özünə sərfəli xəritəsi var və bu xəritə ilə istədiyi maxinasiyanı həyata keçirir.
Diqqətinizə çatdırıram ki, Rüstəm Şahbazovun saxtakarlığını sübut edən cavab məktubunu mən ƏMDX-nin Şəki Ərazi Şöbəsinin rəisinə göstərəkən qurumun rəhbəri niyə Rüstəm Şahbazova onun yalan danışdığını və fırıldaqçılıqla məşğul olduğu barədə birbaşa ƏMDX-nin rəisi cənab Mətin Eynullayevə məlumat vermir? Deməli ƏMDX-nin Şəki Ərazi şöbəsinin rəhbəri üçün vətəndaşın məmnunuluğu yox, Rüstəm Şahbazovun fırıldaqlarının işə keçməsi daha önəmlidir. Buna isə İqtisadiyyat nazirliyində, ƏMDX-də nəzarət edən, qanunsuzluqları araşdıran və vətəndaş üçün layiqli xidmət göstərən yoxdur.
Sözsüz ki, yuxarıda adlarını çəkdiyim qurumların biz vətəndaşlar tərəfindən seçilmiş bələdiyyə qurumlarına qarşı belə qanunsuzluqları, qanunsuz olaraq bələdiyyələrin səlahiyyətlərinin məhdudlaşdırmaları dözülməz bir qanunsuzluqdur. Ən dözülməz qanunsuzluqlardan biri də odur ki, İqtisadiyyat nazirliyi tərəfindən gündə bir MMC yaradılır və onlar faktiki bələdiyyələrin fəaliyyətini yerinə yetirir, bələdiyyələrin qazancında müəyyən faizlər tələb edərək biz vətəndaşlara ciddi zərər vururlar. Eyni zamanda belə oyuncaq MMC-nin də qiymətləndirilməsini ƏMDX sərfəli olmadığı üçün geri qaytarır. Görün nə qədər özbaşınalıq var ki, qiymətləndirmə üçün yuxarılar tərəfindən səlahiyyətləndirilən MMC-nin qoyduğu qiyməti ƏMDX bəyənmir və sənədləri geri qaytarır. Hətta Hərracın Təşkili Mərkəzi də özünü yuxarılarda görür və bələdiyyələri qiymətləri artırmağa məcbur etməyə çalışır, hansı ki, buna heç qarışmağa səlahiyyəti yoxdur.
ƏMDX-nin Şəki Ərazi İdarəsində bir söz ortaya atırlar: “özəlləşdirmə və digər əməliyyatlar dayandırılıb!”. Görəsən Sizlərin hansı bu barədə göstəriş verib? Bu barədə hansı qərar, fərman qəbul olunub? Belə özbaşınalıq olar? İqtisadiyyat nazirliyi qeyri-rəsmi göstəriş verir: “özəlləşdirmə və digər xidmətlər dayandırılsın!” Bu qanunsuz göstərişlər hansı səlahiyyətlərlə tənzimlənir? Sizcə bələdiyyələrin fəliyyətinin dayandırılması barədə İqtisadiyyat nazirliyinin göstərişşləri nə dərəcədə qanunidir? Şəkinin xəritəsində ƏMDX-nin etdiyi qanunsuz dəyişikliklərə kim “dur” deyəcək?
DƏDKR PHŞ-nin Yer Quruluşu Mərkəzinin Şəkidə olan şöbəsi dəfələrlə koordinatlarda dəyişikliklər edərək aktaşdırıb Yür Quruluşu Mərkəzinə təqdim etsə də bu günə qədər Rüstəm Şahbazov şəhərin mərkəzi prospektinin kənarında 200 kv.metr torpaq sahəsini örüş yeri adı altında imtina edərək kimin üçün isə saxlayır. Bu adamın gözü nə zaman doyacaq? Əgər Yer Quruluşu Mərkəzinin Şəkidəki şöbəsinin dedikləri, yazdıqları, araşdırmaları mərkəz tərəfindən, Rüstəm Şahbazov tərəfindən nəzərə alınmırsa onda Yer Quruluşu Mərkəzinin Şəkidəki şöbəsi kimə və nəyə lazımdır? Digər tərəfdən də Rüstəm Şahbazov Yer Quruluşu Mərkəzinə niyə rəhbərlik edir, əgər rəhbərlik edrisə niyə nəzarət etmir?
Rayonda saysız-hesabsız dislokasiyadan yayınmış dövlət obyektləri var. Bu obyektlər satışa çıxarsa külli miqdarda büdcəyə vəsait daxil olar. Onların bir-neçəsinin yeri barədə ƏMDX-nin Şəki Ərazi şöbəsinə rəsmi məlumat vermişəm. Lakin yüz cürə bəhanə ilə həmin obyektlərin satışa çıxarılması təmin olunmur. Əslində belə obyektlərin tapılıb balansa götürülməsi mənim yox, ƏMDX-nin Şəki Ərazi şıbəsinin işidir. Bunların işi bütün günü kabinetdə oturub yalançı seminarlarda iştirak etməkdir, belə seminarlarla büdcəyə gəlir gəlir?
2018-ci ildən bu günə qədər hər ay yerlərdə qəbul keçirmək üçün cədvəl tutulur, hər ay da İqtisadiyyat nazirinin qəbulu təyin olunur. Bu günə qədər mən yüzdən artıq teleqram vuraraq qəbula yazılmışam. Qəbula düşə bilməməyim, müraciətlərin İqtisadiyyat nazirliyi tərəfindən ümumiyyətlə obyektiv araşdırmalara heç cəhd belə edilmədiyi üçün mənim onlarla ərizəm Şəki şəhər Bələdiyyəsində araşdırılmamış qalır. Çünki, İqtisadiyyat nazirliyinin tabeliyindəki qurumların qanunsuz hərəkərləri bələdiyyə tərəfindən müraciətlərimin həllinə imkan vermir. Lakin, 7 ildə bir dəfə də olsun qəbul keçirilməyib. Siz bunu necə qiymətləndirirsiniz?
Möhtərəm Prezident İlham Əliyev Cənabları!
Hörmətli Baş Prokuror cənab Kamran Əliyev!
Konstitutsiya Məhkəməsinin sədri hörmətli cənab Fərhad Abdullayev!
Milli Məclisin sədri hörmətli xanım Sahibə Qaffarova
Yuxarıda göstərdiklərimi nəzərə alaraq vətəndaşlar tərəfindən seçilmiş bələdiyyələrin səlahiyyətlərinin qanunsuz olaraq əlindən alınıb qanunsuz olaraq digər qurumlara, MMC-ə verilməsinin, ƏMDX-nin yerli Ərazi Şöbələrinin qanunsuz olaraq əməliyyatların dayandırılması kimi özbaşınalıqlarının, DƏDKR PHŞ-nin Yer Quruluşu Mərkəzinin torpaq sahələrinin kateqoriyasını, koordinatlarının dəyişdirilərək öz mənafelərinə uyğunlaşdırılmasının qarşısının alınmasına, bələdiyyələrin səlahiyyətlərinin bərpa olunmasına köməklik göstərilməsini Sizdən xahiş edirəm.
Hörmətlə: N.M.Hüseynbəyli.
14.08.2025.