Azərbaycan Respublikasının Prezidenti İlham Əliyevin 27 noyabr 2017-ci il tarixdə təsdiq etdiyi (№ 3406) “Azərbaycan Respublikasında baramaçılığın və ipəkçiliyin inkişafına dair 2018 – 2025-ci illər üçün Dövlət Proqramı”nın sonuncu – 7.3-cü bəndində göstərilirdi ki, “Dövlət Proqramının icrası nəticəsində 2025-ci ilədək yaş barama istehsalı həcminin 6,0 min tona çatdırılması nəzərdə tutulur”. Lakin budur, artıq 2025-ci ildir. Ortada 6 min ton barama varmı? Yoxdur, olmayıb, olmayacaq da! Bu il nəinki 6 min ton, heç 600 ton baramaya da ümid edə bilmirik.
11 iyun 2018-ci il tarixli (№ 2 (2293)) “İpəkçi” qəzetində göstərilirdi ki, “...Azərbaycanda ötən il 244 ton yaş barama tədarük edildiyi halda bu mövsüm üçün 450 – 500 ton yaş barama planlaşdırılıb. Təşkilati işlər ən yüksək səviyyədə həyata keçirilsə də barama qurdu bəslənilməsi üçün yem bazasının zəif olması bu il üçün, həmçinin növbəti 4 il üçün Azərbaycanda ildə 400 – 420 tondan artıq yaş baramanın tədarük edilməsini mümkünsüz edir. Halbuki Azərbaycan 2026-cı ildə 6 min ton yaş barama yetişdirəcəyini bəyan edib”.
Necə olur ki, biz biz artıq 2018-ci ildə görürdük ki, Azərbaycanda 600 – 700 tondan artıq yaş barama yetişdirilməsi mümkün deyil, amma aidiyyəti qurumlar bunu görə bilmirdilər?