Aydın Məmmədov

Aydın Məmmədov — “Şəki Ensiklopediyası” saytının, “Şəki Ensiklopediyası” MMC-nin və “Şəki Ensiklopediyası” jurnalı çap mediasının təsisçisi və baş redaktoru, “İpəkçi” qəzetinin baş redaktoru, jurnalist, ictimai və iqtisadi, elmi-tarixi mövzular üzrə araşdırmaçı. 

28 fevral 1967-ci il tarixdə Nuxada (indiki Şəki), ziyalı ailəsində anadan olub.

Təhsili

1974 – 1977-ci illərdə Şəki şəhər 10 №-li orta məktəbində,

1977 – 1984-cü illərdə Şəki şəhər 19 №-li orta məktəbində təhsil alıb.

1984 – 1985-ci illərdə sanitar-feldşer ixtisası üzrə Şəki Tibb Məktəbində,

1987 – 1989-cu illərdə isə Bakı 2 №-li Tibb Məktəbində təhsil alıb.

2000 – 2001 və 2003 – 2007-ci illərdə muzey işi və tarixi abidələrin mühafizəsi ixtisası üzrə Azərbaycan Dövlət Mədəniyyət və İncəsənət Universitetinin kulturologiya fakültəsində (bakalavriat, qiyabi) təhsil alıb.

12 – 13 noyabr 2018-ci il tarixdə Birləşmiş Millətlər Təşkilatının İnsan hüquqları üzrə müdafiə mexanizmlərinin vasitəsi ilə “İnsan hüquqları monitorinqi, qiymətləndirilməsi və hesabat verilməsi” mövzusunda keçirilmiş təlimdə iştirak edib.

Hərbi xidmətdə

1985 – 1987-ci illərdə həqiqi hərbi xidmətdə olub.

Əmək fəaliyyəti

1989-cu ildən V.İ.Lenin adına Şəki İstehsal İpək Birliyinin əməyin mühafizəsi və texniki təhlükəsizlik şöbəsində texnik vəzifəsində əmək fəaliyyətinə başlayıb.

2009 – 2012-ci illərdə “İpəkçi” qəzetinin ştat üzrə redaktoru,

2012 – 2015-ci illərdə “Mədəni İrsin Qorunmasına Dəstək” İB-də ştat üzrə mütəxəssis vəzifəsində çalışıb.

2016 – 2019-cu illərdə işsiz statusuna malik olub.

2020-ci ildən M.F.Axundzadə adına Şəki Mədəniyyət Mərkəzinin Baş Şabalıd Kənd Diyarşünaslıq Klubunda mədəni təşkilatçı vəzifəsində çalışır.

26 iyul 2024-cü il tarixdə “Şəki Ensiklopediyası” MMC-ni təsis edib və həmin tarixdən bu MMC-nin rəhbəridir.

Publisistika, elm və media sahəsində fəaliyyəti

1989-cu ildən “Şəki fəhləsi” qəzetində Şəkinin tarixinə aid ilk məqalələri dərc olunmağa başlayıb.

1993-cü ildə atası Salis Məmmədovla birlikdə “Şəkinin səsi” qəzetini təsis ediblər və bu qəzetin redaktoru olub.

2009-cu ildən “İpəkçi” və “Şəkinin səsi” qəzetlərinin baş redaktoru olub.

2012-ci ildə “İpəkçi” qəzetinin redaktor ştatı ləğv olunduqda həmin qəzetin nəşrini 2018-ci ilədək, qəzetin saytının fəaliyyətini isə 2022-ci ilin sonunadək davam etdirib.

2019-cu ildə internetdə “Şəki Ensiklopediyası” adlı sayt açıb və həmin saytı idarə etməklə, müntəzəm olaraq yeniləməklə məşğuldur.

2023-cü ilin dekabr ayında Azərbaycan Respublikası Elm və Təhsil Nazirliyinin sifarişi ilə rejissor Vahid Quliyevin çəkdiyi “Şəki maarifi” adlı sənədli filmin elmi məsləhətçisi olub.

30 sentyabr 2024-cü il tarixdə təsisçisi və baş redaktoru olduğu “Şəki Ensiklopediyası” MMC media subyekti və “Şəki Ensiklopediyası” jurnalı çap mediası Azərbaycan Respublikası Medianın İnkişafı Agentliyinin Media Reyestrinə daxil edilib.

28 noyabr 2024-cü il tarixdə Azərbaycan Respublikası Medianın İnkişafı Agentliyinin Media Reyestrində rəsmən jurnalist kimi qeydə alınıb və ona jurnalist vəsiqəsi verilib.

3 mart 2025-ci il tarixdə “İpəkçi” qəzetinin nəşrini və saytının fəaliyyəti yenidən bərpa edib (“İpəkçi” qəzeti çap mediası redaksiyası Azərbaycan Respublikası Medianın İnkişafı Agentliyinin Media Reyestrinə daxil edilib).

Azərbaycanın və xarici ölkələrin elmi nəşrlərində, həmçinin “Mədəniyyət” qəzetində aşağıdakı məqalələri dərc olunub.

İctimai-siyasi aktivliyi

Heç bir siyasi partiyanın üzvü deyil və heç vaxt da siyasətlə məşğul olmayıb.

2009 – 2017-ci illərdə DMOZ Açıq Kataloqunun azərbaycan, tatar, özbək, türkmən, uyğur, qırğız, başqırd dillərindəki saytlar üçün bütün kateqoriyaların və ingiliscə “Azerbaijan” kateqoriyasının və s. kateqoriyaların redaktoru olub[1].

2019-cu il bələdiyyə seçkilərində Şəki şəhər bələdiyyəsi üzvlüyünə namizəd olub, lakin seçilməyib. Bələdiyyə seçkiləri ərəfəsində 113 saylı Şəki Şəhər Seçki Dairəsindən 6-cı çağırış Azərbaycan Respublikasının Milli Məclisinə namizədliyini irəli sürsə də, bələdiyyə seçkiləri ilə bağlı şikayətlərinə baxılmamasını əsas göstərərək namizədliyini irəli sürməyi dayandırıb.

Ailəsi

Ailəlidir bir oğlu və bir qızı var. Qızı Səkinə Məmmədova idmanın müxtəlif növləri üzrə Bakı və Azərbaycan çempionatlarında dəfələrlə fərqlənmiş, Azərbaycan qadın milli kabaddi komandasının tərkibində Kabaddi üzrə Dünya Kuboku 2014-də iştirak etmiş, 2019-cu ilin 21 – 23 noyabr tarixləri arasında Rusiya Federasiyasının Şimali Osetiya Respublikasında sabiq Avropa çempionu, beynəlxalq dərəcəli usta Yelkan Tedeyevin xatirəsinə həsr olunmuş sərbəst güləş üzrə 19-cu Ümumrusiya turnirində bürünc medal qazanmışdır.